admin
反送中遊行示威遍地開花，有網民不滿無綫新聞報道偏頗，發起「反紅媒」圍TVB商場騷，馬國明今日到紅磡出席活動，逾百示威手持反無綫新聞標語到場大叫口號，活動開始前，馬國明在後台接受傳媒訪問，後台範圍都佈滿圍板，市民在中央位置大嗌口號，當發現馬國明在後台時，示威者即手持標語到後台附近大叫口號，大會惟有開大音樂，原有部份電子傳媒因為示威者叫口號，訪問被迫腰斬，而馬國明做完訪問後返回帳幕內休息。
後台有3個保安守衛，留意現場環境，大會一度商討是否繼續舉行活動；而活動開始，場內人士拍手歡呼，但場外示威者繼續叫口號「無綫新聞 出賣港人」，公關指暫時不讓馬國明上台，但都要看看陣間情況再作決定。
結果延遲至2時40分，馬國明終於上台，所有示威者勁噓。馬國明在儀式後落台並返回後台，他全程表現輕鬆及面帶笑容，現場示威者繼續勁噓，及將示威牌推向馬國明方向，並大叫「無綫新聞，出賣港人」口號，而據大會透露，已經報警，而之後示威者轉口號大叫「袁志偉下台」。原來後台有部升降機可以直落停車場，入面已經有警察同保安，撳實部電梯，等馬國明離開，保安用一塊圍欄擋着馬國明與示威者之間，護送他搭電梯離開。馬國明上台時間不足兩分鐘，而他在警方護送下離開之後，示威者都陸續離開。
而馬國明在活動前於後台接受傳媒訪問，被問到怕不怕人身安全受威脅？馬國明說：「我又冇擔心，坦白講，我都係打工仔啫，上次屯門DSE嗰個活動，大會話取消咪取消囉，其實我都以為今日個活動都會取消，但係經理人就話會繼續，我都係打工啫，老闆叫我嚟咪嚟囉，一切都係大會安排啦，大會覺得許可嘅，就會繼續，呢啲嘢唔係我去決定，係大會決定。」問到如果他現身後遇上有人示威或衝擊的話會怎麼辦？馬國明說：「我聽佢哋（商場）講就話會有安排嘅，我覺得最重要係安全，因為今日都有啲小朋友喺度，最緊要保住啲小朋友嘅安全。」
講到網民近日發起「反紅媒」行動，作為無綫當家小生的馬國明會否向公司反映一下？馬國明說：「呢啲都係公司嘅安排，我唔方便講太多。」會否叫新聞部回應港人的訴求？馬國明說：「都係等公司嘅決定，因為我哋唔可以代表新聞部講嘅，其實我好明白有啲人對某啲事不滿，我生活喺香港都有嘢不滿啦，其實每個人都有難處。（你有啲咩不滿？）哎呀，唔好提喇。」問到示威活動會否影響到工作，馬國明謂：「其實就冇嘅，我之後就拍劇喇。（可能會影響到啲人搵外快嘅機會……）呢個唔可以考慮得太多，因為搵錢都係其次，最緊要係安全，錢財都係身外物啫。」
(資料來源：網上截圖/連結)
